Hanes Clwb Trotian Tregaron

Ffurfiwyd Clwb Trotian Tregaron yn wreiddiol yn 1980 fel 'Deri Llanio Racing Comittee' ag yn Neri Llanio ger Llanddewi Brefi cynhaliwyd y rasus cyntaf ym mis Gorffennaf dros ugain mlynedd yn ôl. Ffurfiwyd y clwb i godi safonau a hybi rasus trotian yng Nghymru, heb os ma'r nod wedi ei wireddu gyda chlybiau eraill dros Brydain i gyd yn ceisio efelychu'r wefr sydd yma yn Nhregaron.

Ym 1984 gwelwyd rhedeg y ras trotian fwyaf yng Nghymru. Yma ar gaeau Dolrychain, ym mis Awst am wobr gyntaf o £1000. Drwy weledigaeth Glyn Davies, perchennog y cae, dymchwelwyd cloddiau a throi tri o gaeau yn un. Ffurfiwyd y trac rasio porfa gorau ym Mhrydain. Mae pobl yn methu credu fod sut drac yn bosib yng nghanol y bryniau - mae safon y trac yn rhan enfawr o boblogrwydd ac atyniad y rasus.

Enillydd y ras fawr ar y diwrnod hanesyddol hwnnw oedd MOUNTAIN HERO. Magwyd y ceffyl yn Nhregaron gan ysgrifennydd cyntaf y clwb Gareth Lloyd Davies. Yn anffodus ni fu Gareth byw i weld gwireddiad o freuddwyd pob perchennog ceffyl trotian erbyn hyn - ennill TREGARON. Mi roedd yn addas taw Cwpan Coffa Gareth Lloyd Davies oedd y brif wobr y diwrnod hwnnw ac sydd bob blwyddyn yn cael ei gyflwyno i enillydd GLASUR CYMRU.

Swyddogion Clwb Trotian Tregaron

LLYWYDD: Mr & Mrs Ieuan Davies

CADEIRYDD:Huw Evans

TRYSORYDD:Donald Patterson

YSGRIFENNYDD:Raymond Jenkins